哥哥谈最佳伴侣

whiteblack

大家千祈唔好心邪！以爲最佳伴侶係指阿乜生，其實哥哥所談嘅係佢只狼狗“BINGO”，因爲一向以來哥哥都認爲狗係人類嘅最佳伴侶，所以“BINGO”咪即係哥哥嘅最佳伴侶囉！嗱！無呃你地架！
雖然哥哥係超級大紅人,但就對我地嘅同事非常友善,一啲明星架子都無,唔似得有啲小明星咁鼻大大,而當同哥哥講狗經嘅時候,更加係可以感受到佢係百分之一百嘅愛狗同道中人,係真真正正嘅愛,絕對唔係玩玩嚇果一種,所以邊位習慣用“玩狗”喱個字眼去代替“養狗”嘅人兄，願你決定由喱一刻開始受哥哥感染，拒絕再玩狗，而係用愛去養狗喇！
當年情
言歸正傳，熟悉寵物喱行嘅朋友一定知道宜家最大熱嘅狗，係金毛尋回犬、史納莎之類，但哥哥就只會對狼狗同牧羊狗喱兩種大狗講爲你鍾情，因爲喱兩種狗都係哥哥這些年來所養嘅狗種。
當中嘅牧羊狗係哥哥喺加拿大住果時養嘅，雖然佢係哥哥嘅可人兒，亦同哥哥喺加拿大共同度過唔少刻骨銘心嘅快樂時光，但後嚟哥哥因爲要返香港住，而香港春夏秋冬嘅天氣都同加拿大唔同，尤其係夏天時又濕又熱，如果夾硬將只牧羊狗帶返香港嘅話，就一定要同佢剃毛，由於哥哥向來崇尚由上帝創造嘅自然美，唔想將只牧羊狗原本靚到好似同枕頭一樣軟綿綿嘅披毛剃光，所以哥哥喱位有心人惟有係愛的決擇下忍痛同只牧羊狗分手，將佢送咗俾朋友。
（筆者按：唉！牧羊狗你之所以同哥哥緣盡于加拿大，相信都係只怪你過分美麗，令哥哥唔忍心將你嘅美麗破壞，相信哥哥咁有情義，無論係呷過午後紅茶後，抑或係夢到內河時，都一定會想你，甚至係會有A Thousand Dream of You添！你一定要潔身自愛，唔好紅顔白髮，兼且要小心保重身體，唔好發燒，相信哥哥以後有時間一定會返回加拿大探你，到時候就可以同你深情相擁架喇！）
愛心
回想起加拿大同愛犬嘅當年情，哥哥意猶未盡地表示曾在當地學過train狗呢！
“我中意一手一腳去教，當我發施號令時，佢地都會識聽，但我唔鍾意訓練到佢地純到乜都識做，因爲我覺得狗始終都有佢自己嘅性格。”所以哥哥只會教佢啲狗做啲好似stand up、sit等等嘅基本動作，絕對唔會訓練到佢地好似俾把無形鎖扣鎖住咁！
“其實養狗最緊要有愛心，我唔想聽到有啲人話果個trainer好好，教到只狗好多野，因爲背後只狗可能受到好多體罰，我會唔捨得！所以我覺得應該用一啲好啲嘅方法去train，例如當佢頑皮嘅時候，可以用啲薄嘅magazine去拍打家私之類嘅東西。因爲狗其實係驚聲多過驚痛，除非係打得佢好痛，但咁打法佢會嬲，所以唔應該用體罰。”
（筆者按：養狗其實同養細路差唔多，如果以爲打打鬧鬧就能夠令個細路變乖，就只係妄想，因爲終有一日個細路會唔再受控，然後離家出走，喺烈火邊緣之中，而身爲家長嘅就只會擔心得無心睡眠，而養狗都係一樣，所以諗住用體罰就能夠將只狗教好，除非有Miracle，唔知點解？咪即係奇迹囉！）
左右手
哥哥返到嚟香港之後，喺沒有愛犬相伴之下，尤其係喺每個黑色午夜就會倍感寂寞有害，爲咗唔想夢死醉生咁做怨男，於是哥哥喱位寂寞獵人就喺四年前開始養咗一隻狼狗，而喱只狼狗就係“Bingo”喇！“我鍾意狼狗嘅性格比較忠心，護主心強，好聽話，唔頑皮，我覺得狗最緊要係識得保護主人，我本身住house，當一有人行過我個圍欄，‘Bingo’就會吠。”咁睇嚟，“Bingo”咪簡直係哥哥嘅左右手囉！？
哥哥雖然貴爲超級巨星，但平日佢亦會同一般狗主一樣帶“Bingo”去散步，享受一嚇放狗樂。
“‘Bingo’每日早晚都會出去散步，朝早由工人帶，夜晚就由我自己放。”
（筆者按：唔知我有無咁好彩撞到哥哥放狗呢？如果可以見到哥哥放狗，就算要我做隱身人去偷望都無所謂架！唔知我個睇法會有誰共鳴呢？）
“我覺得狗除咗係聰明嘅動物之外，更加係Man Best Friends，即係人類最佳伴侶，所以一定要令佢感到你嘅愛心，佢會分得好清楚係錫佢定鬧佢，所以當佢頑皮時，一定要令佢知道點解要鬧佢，絕對唔可以無喱頭咁鬧佢。”
（筆者按：如果狗識講野嘅話，相信每只狗都會同主人講：“Love me more！”而且仲係Tonight and Forever，兼且今生今世都會希望能夠陪你倒數人生添！）
風繼續吹
由於哥哥鍾意狼狗同牧羊狗，所以我地亦特別安排咗喱兩隻狗同佢合照。雖然喱兩隻狗只係好似路過蜻蜓咁初次同哥哥見面，但佢地已經情難自控同哥哥眉來眼去，搖頭擺尾之餘，只牧羊狗仲坐喺哥哥對大髀上面影相添！但由於場內實在太多攝記，閃光燈不斷追住哥哥同只狼狗閃呀閃，令只狼狗開始有啲驚，哥哥察覺到佢開始唔得心跳呼吸正常嘅時候，就同在場嘅記者講話影夠了，仲叫啲記者請勿越軌以免嚇親只狼狗添！由此可知道哥哥真係非常非常愛狗，喺娛樂圈中唔知還有誰會比佢更愛狗呢？希望哥哥對狗狗嘅愛心風繼續吹遍每一個角落，令所有狗都能夠身邊有人去愛。
（犬月刊2001年10月）