人 物 誌 ： 幕 後 和 音 （2007）

蝴蝶君

袁麗嫦、張偉文和周小君為徐小鳳個唱做和音，

張國榮和林子祥到後台探班。

現年49 歲的袁麗嫦是孤兒，由養父母養大，讀書時參加民歌比賽勝出，簽約EMI 旗下。78 年為麗的（亞視前身）拍
攝電視劇《鱷魚淚》，高層蕭若元找她為主題曲試音，一試即合，《鱷魚淚》一曲推出便入選港台第一屆十大中文金曲，
成為她的成名作。其名曲還有《百厭仔唔肯吔飯》及卡通片《星仔走天涯》同名主題曲等。可惜推出過幾張唱片後，
與唱片公司鬧得極不愉快而提前解約，之後退居幕後，先後為張國榮、許冠傑、徐小鳳等個唱做和音。

蝴蝶君

相关新闻还有：

洗廁所淋鏹水苦在心   那時那地那人：袁麗嫦、柳影虹淚濕歌衫

在70、80年代，陪香港人一起走過電視撈飯日子的，不但是演技精湛的男女演員，還有那些金曲繞樑的歌手，其中包括主唱《鱷魚淚》的袁麗嫦，及《天蠶變》插曲《換到千般恨》的柳影虹。然而，歌聲背後，竟滿是淚痕──從小便是孤兒的袁麗嫦，為求有棲身之所，17歲便要洗廁所；柳影虹登台演出，遭客人恐嚇淋鏹水……對她們而言，辛酸往事較任何一部經典劇集更為難忘。　撰文：戴彩煥



麗的電視78年推出的劇集《鱷魚淚》同名主題曲，令袁麗嫦一炮而紅，一出道即入選港台「第一屆十大中文金曲」。本來，袁麗嫦大可在樂壇大展拳腳，但瞬間竄紅的她卻瞬間消失。回想當年，袁麗嫦實在心有不甘，她日前接受專訪時說：「點解我唔唱？因為唱片公司冇歌畀我唱囉！自己又唔識作曲，點同人爭？而且，我唔可以好專心做，因為我係孤兒，養父養母年紀又大又唔識字，我家庭負擔好重，邊有時間諗咁多嘢、邊度識為自己打算！」

任文職兩年就因為袁麗嫦的不懂事，令她與養父母流離失所，她說：「我自細住喺爸爸（養父）宿舍，爸爸退休之後，佢公司求其畀份工我做，等我哋可以繼續住宿舍，當時新人係冇咁嘅資格，佢公司咁做已經對我哋好好！當年我17歲，好記得第一日返工，原來畀個廁所刷我洗廁所，你估我係阿嬸咩！當時我真係好難受，但都『骨』一聲吞咗去。不過，做咗一日之後，老闆畀咗份文職我做，一做做咗兩年，做做吓我簽咗唱片公司，成日要做騷要宣傳，周身唔得閒，於是我辭咗寫字樓份工，咁就衰啦！一辭就冇地方住，呢個包袱，我諗番起都好內疚！」

寧放棄事業不懂為自己爭取，不懂講說話，其實是袁麗嫦事業最大致命傷，她說：「啱啱出《鱷魚淚》隻碟，有個舊同學好坦白同我講：『人哋畀啲咁嘅歌你（《鱷魚淚》除外），你都咁畀心機唱？』佢一講，我愕咗然，唔知點答，係喎，嗰啲冇人肯唱嘅歌就質畀我唱，我應該出聲，但當時年紀細、冇主意，公司（EMI）唔理我、對我唔好、畀埋啲垃圾歌我唱。嗰時自己純到有啲鈍，如果唔係我點會咁霉、點會銷聲匿迹？最好笑係後來我俾公司雪藏咗都唔知，到睇報紙先知，因為我同個記者講，話《百厭仔唔肯吔飯》首歌唔好聽，冇melody冇音樂感，公司咪雪我囉！」在合作極不愉快情況下，袁麗嫦與唱片公司提前解約，從此退居幕後做和音，如羅文、張國榮、徐小鳳和林子祥等個唱，她也有份參與。

袁麗嫦後悔當年不懂為自己爭取，但柳影虹卻認為許多時怎樣爭也爭不到。柳影虹說：「有啲嘢畫公仔唔使畫出腸，有時想爭，有啲人可以付出啲某啲嘢，可以犧牲某啲嘢，你係做唔出，總之機會嚟到自己就要好好把握！做人總有得有失，當年如果我得到好多，可能我又未必搵到個好家庭，咁忙嘅話邊有時間拍拖！」

登台遇醉貓回想當年水銀燈下唱歌登台日子，柳影虹也有不少驚心動魄的難忘往事，她說：「有次夜總會登台，有個客人飲醉酒，叫我落台同佢敬酒講生日快樂，又話唔畀我出門口，又話要淋我鏹水，我驚到即刻報警，跟住成隊差人送我返屋企。不過，個客後尾知道自己唔啱，第日專登走嚟跪低同我道歉，我知道佢唔係有心，所以原諒咗佢。」

70、80年代，首首電視劇主題曲和插曲也是金曲，但今日，卻難有一首半首得到共鳴，柳影虹感慨說：「o依家嘅劇集都唔吸引，隻歌又點會吸引吖！」